Հիվանդության կամ վնասվածքի հետևանքով օրգանիզմի ֆունկցիաների կայուն խանգարման առկայության դեպքում համապատասխան բժշկական կազմակերպությունը, անհրաժեշտ ախտորոշիչ, բուժական և վերականգնողական միջոցառումներ իրականացնելուց հետո, իսկ տևական բուժում պահանջող հիվանդությունների դեպքում՝ բուժման ընթացքում (սակայն ոչ շուտ բուժման սկզբից, քան 3 ամիս անց, բացառությամբ վերականգնման հեռանկար չունեցող հիվանդություններից), անձին ուղեգրում է ֆունկցիոնալության գնահատման:

Բժշկական օգնություն և սպասարկում իրականացնող կազմակերպության ուղեգիրը և դրան կից բժշկական փաստաթղթերը լրացվում են հայերենով և պետք է ունենան առնվազն հետևյալ վավերապայմանները` 

1. Փաստաթղթի տրման ամսաթիվ, տարեթիվ, հերթական համար,
2. Անձի անուն, հայրանուն (առկայության դեպքում) և ազգանուն,
3. Բժշկական կազմակերպության անվանում, հասցե,
4. Բուժման ժամանակահատվածի սկիզբ և վերջ (տևական բուժման դեպքում՝ սկիզբ),
5. Առողջական վիճակի խաթարումը նկարագրող տեղեկատվություն,
6. Փաստաթղթի տրամադրման հիմքեր,
7. Ստորագրող պաշտոնատար անձի անուն, ազգանուն, պաշտոն, կազմակերպության դրոշմակնիք,
8. Անձը հաստատող փաստաթղթի սերիա և համար, անձնագրի դեպքում՝ նաև հանրային ծառայությունների համարանիշ կամ համապատասխան տեղեկանք: